Paglimitar sa mga air conditioning sa mga mall, ipinagsugo kan DTI Bicol

Ipinag-orden kan Department of Trade and Industry o DTI an paglimitar kan air-conditioning, paghali nin free wifi connections asin sale events sa mga malls mantang nasa irarom nin General Community Quarantine o GCQ.

Segun kay DTI Bicol OIC na si Rodrigo Aguilar, sinabi nya na ini basado sa kasuguan kan Inter Agency Task Force o IATF sa katahawan kan coronavirus disease pandemic.

Sa paagi kan DTI memorandum circular 20-21, ipapautob ini sa gabos na mga malls, shopping centers asin establisimiento na tinugutan makapagbukas sa irarom kan general community quarantine.

Segun kay Aguilar, limitado an bilang kan pwede na maglaog sa mga malls o sarong persona sana kada 2 metro kwadrado sa total na 'open space' kan lugar.

Kinakaipuhan man segun saiya na bawasan an mall entrances sa pagmanehar kan foot traffic partiklar na sa high-density areas siring kan supermarkets.

Posible man segun kay Aguilar na tugotan makalaog an miyembros kan vulnerable sector kun wara nin ibang pipilian na paagi basta igwa nin kaibang sarong persona na maasistir sa mga ini.

Dugang pa ni Aguilar, dapat na maggibo nin one-way flow an mga malls para maibitaran an pagsasarabatan kan mga customers. Kasabay kaini iyo an pagbugtak nin mga marka siring sa escalators sa pagpautob kan social distancing.

Pigdidisganar man an pagkonducir nin sale events, marketing events o ano man na aktibidad sa posibilad nin crowd gathering.

Pahayag pa kaini, posibleng ipasara an mga siring na establisimiento kun magbalgar sa mga protocols.

Pag-abot naman sa mall goers, pagirumdom ni Aguilar na kun bako man importante an gigibuhon sa mga malls iyo an dae na magluwas sa saindang mga harong.

0 comments:

Post a Comment

• IBA PANG BARETA