CHED Bicol, dae matao nin bagong merit scholarships

Ipinahayag kan Commission on Higher Education o CHED Bicol na sinda an dae matao nin bagong merit scholarships ngunyan na taon rason kan kadipisilan pinansyal may relasyon sa coronavirus pandemic.

Sinabi ni Dr. Freddie Bernal, regional director kan CHED Bicol, posible sanang matawan sa natatadang budget kan opisina iyo an existidong scholars sa irarom kan CHED Merit Scholarship Program.

Paliwanag ni Bernal, ini an paramientras na sinuspendir para matabangan an espwersos kan gobyerno laban sa COVID-19 pandemic siring man matawanan nin importansya an need-based scholarships kumpara sa merit-based scholarships.

An merit scholarhips iyo an asistensya pinansyal na pigtatao sa mga estudyante base sa saindang grado kun saen ini pwede magamit para sa tuition, miscellaneous asin iba pang educational fees.

Dugang pa ni Bernal, posible na maibalik an aplikasyon para sa merit scholarship sa masunod na taon.

0 comments:

Post a Comment

• IBA PANG BARETA