Guidelines sa pagpapaotob kan General Community Quarantine sa probinsya kan Sorsogon, ipinalowas ni Gov. Chiz

Post a Comment
Nagpalowas nin kasuguan an gobyerno probinsyal na magsisirbing guidelines sa pagpapaotob kan General Community Quarantine sa probinsya kan Sorsogon.

Sa pinirmahan na Executive Order 36-2020 ni Sorsogon Goc. Francis Joseph Escudero na may titulong, Control System of Mandatory Quarantining and Checkpoints under GCQ in the Province of Sorsogon, ipinagsugo kaini na an gabos na tawo na malaog sa probinsya iyo an masairarum sa mandatory 14-days quarantine sa mga designadong quarantine facility.

Gabos na drivers asin pahinante kan delivery trucks na papasiring sa kabisayaan hale sa Metro Manila asin bise bersa iyo an tutugutan na makalaog alagad dae pwedeng magbaba an mga ini sa sasakyan kun saen bubugtakan nin sticker asin tape an pinto asin bintana kan truck na magseserbing selyo asin dae pupwedeng raoton sagkod sa dae sinda makahale sa probinsya.

Dae man tutugutan na makababa nin sasakyan an mga driver asin pahinante kan delivery trucks na magdadara asin magdadara nin 'goods' sa probinsya asin kinakaipuhan na e-isolate an sisay man na indibidwal na maresibe kan delivery kun saen kinakaipuhan na makalowas an mga ini sa probinsya sa laog nin 12 oras.

An mga Sorsoganon naman na nagtatrabaho sa Albay asin sa lowas kan probinsya iyo an inaabisuhan na mag "work from home"  na sana o kaya maghanap nin estaran sa saindang mga pinagtatrabahuan na lugar an sisay man na dae makakasunod iyo an isasairarum sa Mandatory Mass Quarantining asin isolation.

An mga pasyente na gikan sa ospital o ibapang medikal na pasilidad na hale sa lowas kan probinsya iyo an isasairarum man sa kwarantina asin isolation.

Hinale naman sa nasabing EO an pagsasagibo nin checkpoint sa mga barangay asin munisipio, alagad mamantenir an checkpoint sa mga entry and exit point sana kan probinsya partikularmente sa mga minasunod na lugar: Brgy, Potiao sa Pilar, Sogoy, Castilla; Ogod, Donsol, Brgy. Burabod sa Bacon District, Sorsogon City; Brgy. Fabrica sa banwaan kan Bulan, Brgy Sta. Cruz asin Banuang Gurang sa Donsol, siring man an mga seaport kan Matnog, Pilar, Castilla asin Sorsogon City.

Magiging epektibo an siring an orden, alas 12 an matanga sa Biernes, Mayo 1.

Related Posts

There is no other posts in this category.

Post a Comment

Subscribe Our Newsletter