EO para sa GCQ guidelines, ipinalowas kan LGU Casiguran; libreng gasolina sa mga namamasada, itatao poon Mayo 1

Post a Comment
Kinompirmar kan Casiguran Municipal Information Office, na tatawan kan lokal na gobyerno nin libreng gaas o krudo an mga mamamasadang Jeepney asin tricycle driver sa saindang banwaan epektibo Mayo 1 o sa primerong aldaw kan implementasyon kan General Community Quarantine.

Sinabi kan CMIO, na tutugutan sanang makabyahe an mga ini kun masunod sa protocol siring kan social asin physical distancing kasabay na an pagamit nin face mask.

Sa irarum kan kasuguan, lilimitaran sana sa 10 pasahero an jeepney mantang dowa naman sa tricycle.

Mahigpit man na ipapasunod kan LGU an pagsingil nin regular na pasahe sa mga passengers asin an limitadong bilang kan mamamasada kun saen mapalowas ini nin schedule sa pagbyahe kan mga pampublikong behikulo.

Hinale naman an window hour kan LGU Casiguran sa mga Public Market, grocery stores, agriculture and pet shops alagad dapat may bitbit asin makapagpresentar an mga ini nin GCQ pass.

Tinutugutan naman na makabalik trabaho an mga obrero sa kondisyon na may dara an mga ini nin ID asin certification hale sa barangay.

Mantenido man an curfew mantang an mga nag-eedad sana nin 21 hasta 59 anyos an tutugutan na makalowas asin magbakal nin mga mayor na pangangaipo asin may dara man guiraray na ECQ pass.

Siniguro man kan LGU na mahahampang sa magkakanigong padusa o penalidad an mabayolar sa siring na kasuguan.



Related Posts

There is no other posts in this category.

Post a Comment

Subscribe Our Newsletter