LGU Bulusan, may pa-Tiktok challenge sa mga kabataan sa tahaw kan ipinapaotob na lockdown

Tanganing maiwasan an paglowas sa harong asin sobrang pagkakaboring kan mga kabataaan sa banwaan kan Bulusan, nagdesisyon an lokal na gobyerno na magtao nin premyo sa paagi kan nauusong tiktok challenge.

Sa facebook post ni Marcky Ragasa, hepe kan Bulusan MDRRMO, bukas an siring na contest sa mga Bulusenio na nageedad nin sais hasta katorse anyos.

Pwedeng magpartisipar digde an sarong indibidwal o grupo sa paagi kan pagsend o pagtag kay Ragasa kan ginibong one-minute tiktok video.

Segun kay Ragasa, saro sanang entry sa kada account an saindang aakoon, dapat sa laog kan harong ginibo an video, asin mahigpit na pinagbabawal an pagpapadara nin bastos na video o may nudity.

An deadline kan siring na contest iyo an ipinagtalaan sa Biernes, Marso 27 mantang sa martes, March 31 i-aanounce an winner asin ihahatod mismo kan LGU sa harong kan contestant an ginanahan na premyo.



Makakaresibe nin 1,500 pesos an itatanghal na 1st place, 1k naman sa 2nd place, 500 pesos sa 3rd price winner mantang tatawan man nin tig-200 pesos an mga 4th to 10th place.

0 comments:

Post a Comment